చదువు ఎలా ఉండాలంటే ?

మనం ప్రకృతిలో ఓ భాగం.

మనం నేర్చుకొన్న పాఠాలన్నీ ప్రకృతిని అనుకరిస్తూ అనుసరిస్తూ నేర్చుకొన్నవే.

ప్రకృతిని పరిశీలిస్తూ పరిషోదిస్తూ - మనం ఎన్నో విషయాలు తెలుసుకొన్నాం.

ప్రకృతిని ప్రేమిస్తూ ప్రకృతితో విభేధిస్తూ - ఎన్నో మెళుకువలు అలవరుచుకొన్నాం.

ప్రకృతితో పోరాడుతూ - గెలుస్తూ ఓడుతూ -ఎంతో నైపుణ్యాన్ని సాధించాం.

మనం జంతువులం.

మన బుద్ధి మనల్ని మనుషులుగా తీర్చి దిద్దింది.

మానవ విలువలు మనం ఏర్పరుచుకొన్నవి.

మానవ సంస్కారం మనం నిర్వచించుకొన్నది.

ఆలోచన అనుభూతి మనకు ప్రకృతిసిద్ధంగా లభించినవే.

నేను మనిషిగా ఉండాలంటే -

నా సహజసిద్ధ లక్షణాలను ,అపురూప గుణాలను పదిల పరుచుకొనేలా ఉండాలి.మరింత మెరుగు పరుచుకొనేలా ఉండాలి.

*

ప్రకృతి మరో చమత్కారం మనకున్న అద్బుత శక్తి - "జ్ఞాపకం"

నిప్పు కాలుతుందని నిరూపించడానికి ప్రతిసారీ మనం చేతులు కాల్చుకోనక్కర లేదు.

మనకు తెలుసు. మనం ఇతరులకు తెలియపరచ గలం.

మనకు తెలిసిన దానిని మనం భద్ర పరుచుకోగలం.పంచుకోగలం.పెంచుకోగలం.

ఒకరి  నుంచి ఒకరికి - ఒక తరం నుంచి మరొక తరానికి -అందించ గలం.

ఇది మన సహజ స్వభావం. ఇవ్వాళ - ఆ స్వభావానికి ఒక క్రమబద్ద్దత వచ్చింది. " బడి" రూపమైంది!

చదువు "బడి" లోనే ఉందనీ ..ఉండలనీ.. అనుకోవడం మొదలుపెట్టాం.

అందుకే..చాలా శ్రద్ధగా బడి చుట్టూ గోడలను కట్టాం. చదువు భద్రంగా ఉందని సంతోషపడుతున్నాం.

కానీ, ప్రకృతి ఆ గోడలకు బయట ఉందన్న విషయం మరిచి పోయాం.

ప్రకృతి మన తొలి బడి.సహజమైన బడి.

చదువు ఎలా ఉండాలంటే -

ప్రకృతిలో ఓ అంతర్భాగమై ఉండాలి.

*

"బైట ఉండాల్సిన వేమిటో 

లోన ఉండాల్సిన వేమిటో 

అన్నీ నాకు తెలుసు .

ఐతే ,

ఈ కిటికీకి 

ఇక్కడేం పని?" ...అంటూ అమాయకంగా ఓ పెద్ద ప్రశ్న వేస్తారు "స్మైల్" తమ గోడ అనే కవితలో .

చదువు ఎలా ఉండాలంటే –

గోడలతో నిండి పోయి కాదు ,ఒక చిన్న కిటికీలా ఉంటే..

చాలదా?

(26-1-07,వికాసవనం, విజయవాడ,ప్రసంగ పాఠం  నుంచి ఇంకొంత  )

 All rights @ writer. Title,labels, postings and related copyright reserved.