వజ్రమంటి వంకాయ

ఇవ్వాళ వంటేం చేస్తున్నారు?

గుత్తొంకాయ కూరా?

ఘుమ ఘుమ లాడి పోతోంది!

ఏది ఏమైనా,
పిల్లలను బడికి పంపే తొందరలో ఉన్నా.. ఆఫీసుకు వెళ్ళే హడావుడిలో ఉన్నా..పచ్చడో పులుసో వేపుడో...రుచిగా వండిపెట్టేయడానికి ..వంకాయను మించిన కూరగాయ ఏమున్నది?

  అందులోనూ,వగలమారివంకాయ సెగలేకుండా ఉడుకుతుంది కదా? అదేమిటీ? నిన్న మీరు కొన్న వంకాయల్లో సగానికి సగం పుచ్చి పోయాయా? అరరే!

  అది సరే కానీ, మీ పుచ్చొంకాయల కారణంగా ఈ ప్రపంచం రెండు వర్గాలుగా చీలిపోయిందని మీకు తెలుసా?

ఆ వివరాలు మీతో పంచుకో బోయే ముందుగా మీకు ఒక విశేషం చెప్పాలి. వంకాయ పుట్టిల్లు మన దేశమే.

 వంకాయంత వజ్రాన్ని దొండకాయంత దొంగ ఎత్తుకెళ్ళాడని .. కథలు చెప్పుకొంటాం. 
వంకాయ వంటి కూరా సీత వంటి భార్యామణి ..అంటూ ముక్తాయిస్తూ ఉంటాం.
గుత్తొంకాయ కూరతో పాటూ కొసరి కొసరి సరసాలు వడ్డించినా .. వంగకాయ తొడిమ నిశిలో శశి అంటూ కవిత్వాలు పండించినా.. వంకాయ మన వ్యవహారిక జీవితంలో ఎంతగా అల్లుకు పోయిందో తెలియజేస్తుంది. వంకాయ రుచీ ప్రాచుర్యమూ ..పోషకవిలువలూ ప్రాధాన్యమూ .. ఇంతింతని చెప్పలేము.

అయితే , పురుగు పుచ్చు లేని వంకాయ కోసం ఏకంగా బాసిల్లస్ తురంగస్ అనే సస్యరక్షణ క్రిమిని జన్యుమార్పిడి విధానం ద్వారా వంకాయలో ప్రవేశ పెట్టి ,ఆ పంటను ప్రపంచంలోనే మొట్టమొదటి సారిగా మనదేశంలో విస్తృతంగా పండించే ఏర్పాట్లు ఒక వైపు జరుగుతున్నాయి.

మరో వైపు, పర్యావరణ పరిరక్షణ కోసం ప్రపంచ దేశాలు కోపెన్ హాగెన్ లో సమావేశమై ఒక అంతర్జాతీయ సదస్సును నిర్వహిస్తున్నాయి. ఈ నేపధ్యంలో ,ప్రపంచవ్యాప్తంగా వంకాయ ఒక సంచలనాత్మక చర్చకు మూలమైంది.

సహజ సేద్యపు ఉద్యమకారులు వద్దు వద్దని వారిస్తున్నా ..క్రిమి సం హారక మందుల ఉత్పత్తిదారులు ఎంతగా లాబీ చేసినా..GEAC అంటే Genetic Engineering Approval Committee వారి అనుమతితో పర్యావరణ అనుమతులను పొంది ,మన దేశపు పోలాల్లో సాగుకు సిద్ధమవుతుంది, జన్యుమార్పిడి వంకాయ, జంకాయ.

అవునండి.

ఇవ్వాళ వంకాయ గురించి జరుగుతున్నంత చర్చ..మరే ఇతర కూరగాయ గురించి జరగలేదు.

జన్యుమార్పిడి వంకాయ విత్తనోత్పత్తిదారుల వాదన ఏమిటంటే..

-క్రిమి సం హారక మందుల వాడకం తగ్గిపోతుంది.వాతావరణ కాలుష్యం తగ్గుతుంది.

-రుచి, పోషక విలువలు సాధరణ వంకాయలలో ఉన్నట్లే ఉంటాయి.

-CRY 1ACజన్యువు విడుదల చేసే ఒక ప్రోటీన్ విషతుల్యంగా ఉండి ..కాయను  మొవ్వును తొలిచే పురుగును నివారిస్తుంది. అలా 60 నుంచి 70 % వరకు పంటదిగుబడిని పెంచుతుంది.

అంటే, మన మార్కెట్లలోకి ఇక పుచ్చు వంకాయలు రావని వారు చెపుతున్నారన్నమాట! మనలాంటి వారికి ఇది శుభవార్తే! కానీ, జన్యుమార్పిడి వంకాయను ససేమిరా వద్దంటున్న వారిలో ఆర్గానిక్సేద్య ఉద్యమకారులు,శాస్త్రవేత్తలు ఏమంటున్నారో అదీ విందాం!

- జంకాయ ను తినడం వన మన శరీరంలో యాంటీ బయాటిక్స్ ను పనిచేయనివ్వని నిరోధక శక్తి పెంపొందుతుందని ఫ్రెంచ్ శాస్త్రవేత్త కేన్స్ విశ్వవిద్యాలయానికి చెందిన ప్రొ.షెరెలిని గారు వెల్లడించారు.

-జన్యు మార్పిడి ఆహారం తీసుకోవడం వలన అల్లెర్గీలు వస్తాయనీ,మూత్రాకోసం,కాలేయం వంటి ముఖ్యమైన అవయవాలు దెబ్బతింటాయనీ,మన రోగనిరోధక శక్తి పై తీవ్రప్రభావం పడుతుందనీ.. .స్వయాన మన పూర్వ కేంద్ర వైద్యాశాఖామాత్యులు డా.అంబుమణి రామదాస్ గారు ప్రధాని మన్ మోహన్ సింగ్ గారికి రాసిన లేఖలో స్పష్టపరిచారు.

-కాగా, వంధ్యత్వం నుంచి అనేక అవాంచిత శారీరక రుగ్మతలకు ,పరిణామాలకు బిటి వంకాయ మూలం కావచ్చని హెచ్చరికలు వినిపిస్తున్నాయి.

ఈ నేపథ్యంలోనే, వంకాయపై జన్యు మార్పిడి పరిశోధనలు పూర్తయినట్లూ,పంటపొలాల్లో సాగు కొరకు ప్రయోగాలు కొనసాగించవచ్చుననీ..అనుమతులు జారీ చేసారు,GEAC వారు.

సరిగ్గా అప్పుడే,మరోసారి అంతర్జాతీయ చర్చకు తెరతీసింది వయ్యారి వంకాయ. - ఇదొక సాంకేతిక విజయం.శాస్త్రీయతను అంగీకరించేవారు ఈ విషయాన్ని తోసి పుచ్చలేరు.

అయితే,మరే ఇతర దేశమూ అనుమతించని ఈప్రయోగానికి మనదేశంలోనే ఎందుకు అనుమతించబడిందో మనం పరిశీలించాలి.ఈ అవాంఛిత ప్రయోగం వలన ప్రమాదాలు రెండు.

ఒకటి- జన్యుకాలుష్యానికి లోను కావడం.

      రెండు- జన్యువైవిధ్యాన్ని కోల్పోవడం.

- వంకాయకు మనదేశమే పుట్టిల్లు.జన్యుమార్పిడి వంకాయపంటపొలాల్లోని సమీప పంటలన్నిటి పైనా ఈ విషతుల్య జన్యువు ప్రభావం ఉంటుంది.ఇతర పంటలలో జన్యుకాలుష్యం ఏర్పడుతుంది. ఈ పంట పండించిన పొలాల్లోని మట్టిలో సమూల మార్పులు వస్తాయి.

 ఆ పొలాల్లో ఇతరపంటలు పండిస్తే ఆ పంటలలోకి ఈ విషతుల్య జన్యువు ప్రవేశించే ప్రమాదం ఉంది.ఆ పొలాలలో ఇతర పంటలను పండించే వీలు ఉండదనీ ..ఆ సమీప పంటలన్నీ జన్యు కాలుష్యానికి గురవుతాయనీ ..ఉద్యమ కారులు హెచ్చరిస్తున్నారు.

 -పురుగు తక్కువగా సోకే ఒక రకం వంగడం,వంకాయలోని భిన్నరకాలను నామరూపాలు లేకుండా చేసే అవకాశం ఉంది.అలా జన్యువైవిధ్యాన్ని కోల్పోవడమే కాకుండా ..మన వంకాయనే మనం కోల్పోతాం.శాశ్వతంగా!

ఇక, ఏ విత్తనోత్పత్తి సంస్త ఈ జన్యుమార్పిడి వంకాయను ఉత్పత్తి చేసిందో ,వారి నుంచే రైతులు వంకాయ విత్తనాలు కొనుగోలు చేయాలి.రైతుల వ్యవసాయ పెట్టుబడి ఈ రూపేణా పెరిగిపోతుంది.ఒక సంస్థ గుత్తాధిపత్యంలో మన దేశ వ్యవసాయరంగం చిక్కుకు పోతుంది.

-వంకాయ కాయను,మొవ్వును తొలిచే పురుగు(BFSB, Brinjal Fruit and Shoot Borer) రోగనిరోధక శక్తిని పెంపొందించుకొంటే ఎలాగన్న ప్రత్యమ్నాయాలను ఇంత వరకు ప్రకటించ లేదు.

-ఈ పురుగులు కాక ఇతర క్రిముల తాకిడిని గానీ రోగాలను కానీ చీడపీడలను గానీ ..ఈ జన్యువు ఏ విధంగానూ అరికట్టలేదు.ఇతర క్రిమిసంహారక  మందులు యధాప్రకారం వాడవలసిందే. ఆ సంస్థ వారు ప్రకటించి నట్లుగా పర్యావరణకాలుష్యాన్ని తగ్గించక పోగా .. జన్యుకాలుష్యానికి ఇది తెర తీస్తుంది!

వంకాయను జన్యుమార్పిడి విధానంలో పండించి ..మనకు వడ్డించే లోపలే ఆ జన్యుమారిడి వంకాయను ఉదాహరణగా చూపుతూ 56 రకాల ఇతర జన్యుమార్పిడి పంటల అనుమతుల పర్వం ముగుస్తుంద్! అందులో 41 రకాలు ఆహార పంటలే!

 అమెరికా అధికారక Agri-Biotechnology Support Programme దీని వెనుక ఉండడం చేత GEAC అనుమతి మరింత వివాదాస్పదమైనది.

 PM భార్ఘవ గారి వంటి శాస్త్రవేత్తలు 102 పేజీల నివేదికను కేవలం గ్నటలో పూర్తి చేసి ప్రకటించడం ..అది కూడా కేవలం రెండేరెండు సమావేశాలలో నిర్ధారణకు రావడం లోని ఆంతర్యాన్ని ,ఈ వ్యవహారం లో GEAC యధాలాప ధొరణిని ..ఘాటుగా ప్రశ్నిస్తున్నారు.

మనదేశంలో,2007 నందు 8.5 మిల్లియన్ మెట్రిక్ టన్నుల వంకాయ పండించబడింది.కనుక, కేవలం వ్యాపారదృష్టి బహుళజాతి వ్యాపారసంస్థలు మందేశంపై దృష్టి నిలపడంలో ఆశ్చర్యం ఏముంది?

వంకాయకు పుట్టిల్లయిన మన దేశంలోనే .. ప్రపంచంలో మొట్టమొదటిసారిగా ..జన్యుమార్పిడి వంకాయ విడుదల . మొట్టమొదటి జన్యుమార్పిడి కాయగూర!

వారి విత్తనం..వారి పరిశోధన..వారి నివేదకలు... మనకు వడ్డింపులు..!

బి.టి. వంకాయను మార్కెట్లోకి విడుదల చేసినట్లయితే ,సహజంగానే దేశవాళీరకాలను,సాంప్రదాయ సంకరవంగడాలను తోసిరాజని బిటివంకాయ వ్యాపిస్తుంది.అందుకు ప్రధాన కారణం పంటవిస్తీర్ణం పెరగడం.ఆ దరిమిలా ధర తగ్గడం.

సామాన్య వినియోగదారులం ఎక్కడ చవకగా దొరికితే అక్కడ కొంటాం.ఎందుకు చవకగా దొరికిందని ఆలోచించం.ఆ అనాలోచిత క్రియ మన శరీరాలను ఒక ప్రయోగానికి పరీక్షనాళికలుగా చేస్తోందన్న మాట!

 కాగా, దీనికి ప్రత్యామ్నాయంగా చెప్పే సహజసేద్యపు దేశవాళీ వంకాయలు సామాన్యుల చేరువలో ఉండవు.ఇది పాశ్చాత్యదేశాలాలో ఇప్పటికేఅనుభవంలోకి వచ్చిన సత్యం.కనీసం అక్కడ జన్యుమార్పిడి పంటలకు లేబిలింగ్ సదుపాయం ఉంటుంది.వినియోగదారులకు స్పష్టపరచడానికి .వర్ధమాన దేశాలలో ఆ సదుపాయం లేదు.

 ఏది ఏమైనా ,జన్యుమార్పిడి వంకాయపై ఒక సంగ్ర అవగాహన లేనిదే ,మనదేశంలోకి అనుమతించడం ..భారతీయ వటవృక్షాన్ని తొలిచే వేరుపురుగును స్వయంగా పెంచిపోషించినట్లే!

కోపెన్ హాగెన్ పర్యవరణ సదస్సు సంధర్భంలో ,దేశవాళీ వంకాయను సంరక్షించేందుకు ..జన్యుమార్పిడి వంకాయను మరింత పరీక్షించేందుకు ..పంటను వంటను పరిరక్షించేందుకు..ఒక సమగ్ర కార్యాచరణ ప్రణాళికను ప్రకటించాలి.

సరే కానీ, మీ వంట పూర్తయినట్లుంది. మీరు వండే వడ్డించే కాయగూరల నేపధ్యం ఏమిటో .. అవి మీ శరీరం పై మీ కుటుంబ సభ్యుల ఆరోగ్యంపై ఎలాంటి ప్రభావం చూపుతాయో ..తెలుసుకొని మెలగాల్సిన అవసరం ఎంతైనా ఉందని ..మీరు ఇప్పటికే గ్రహించి ఉంటారు.

 అటు దేశపౌరులుగానూ ..ఇటు వినియోగదారులుగానూ ..ఇది మన బాధ్యత.

 మన సహజ జన్యుసంపదను, ప్రకృతి సమతుల్యాన్ని, పర్యావరణాన్ని కాపాడుకోవడంలోనే మన భద్రత ఉన్నది. వజ్రం లాంటి వంకాయను దాని లోని విభిన్న వంగడాలను పదిలంగా పదికాలాలపాటు భద్రపరుచుకోవడంలోనే మన విజ్ఞత ఉన్నది! కదండీ!?!

*

<<<వంకాయ గురించి ఇంత హడావుడి అవసరమా అన్నారొక పాఠకులు అల్లంత దూరాన నుంచి ఫోను జేసి మరీ. .ఈ విషయం ఎంతో ముఖ్యమైనదని భావించడం చేత ..ఈ విషయాన్ని మరింతగా మాట్లాడవలసిన అత్యవసర పరిస్త్థితి లో ఉన్నామని భావించడం చేత..ఈ నాలుగు మాటలు . మీ అబిప్రాయం కోసం.>>>

*

ఆకాశవాణి, హైదరాబాదు కేంద్రం వారికి,"చినుకు" మాస పత్రిక వారికి ధన్యవాదాలతో.
< ఆకాశవాణి, "వర్తమానం" శీర్షికన 11-12-2009 నాడు ప్రసారం చేయబడింది.
చినుకు మాస పత్రిక ,జనవరి,2010, సంచికలో అచ్చయింది.>
            
>Post: వగల మారి వంకాయ
> Link: http://chandralata.blogspot.com/2009/10/blog-post_21.html

Title,labels, postings and related copyright reserved.