హా ....చ్చ్ ....సారీ సారీ...!

ఇలాంటి ఉత్తరాలు అడపాదడపా వస్తూనే ఉంటాయి.

కాకపోతే ,ఈ మారు కోల్ కతా నుంచి. అందునా ,పశ్చిమబంగ బంగ్లా అకాడమీ వారి సుముఖం నుంచి.

ఏమీ లేదు.

అనేక శుభాకాంక్షలు. ఆ దరిమిలా,ఒక జాతీయ పురస్కారం.

ఎవరికేమిటి?

 అక్షరాలా నాకే.

నా పేరు.ఇంటిపేరు చిరునామా,పిన్ను కోడు,చదువు, పుట్టిన తేదీ ఇతర వివరాలన్నీ ..అచ్చుగుద్ది మరీ పంపారు.

ఎలా కాదన గలం ?

ఈ కబురేమిటీ ..ఇంత చల్లగా చెపుతున్నానని అనుకోబోయేరు.

కాస్తాగాలి మరి.

ఇక నేం.

కోల్ కతా కి ప్రయాణం కట్టాల్సిందే.

అన్నట్లు, కుటుంబాన్నంతా రమ్మని ఆ పత్రం సాదరంగా ఆహ్వానించింది కదా.. “వెళ్ళి తీరాల్సిందే “. ఉత్సాహంగా ప్రకటించేసారు  మా అమ్మాయి అబ్బాయి ..వాళ్ళ నాన్నాను! సోనార్ బాంగ్లా ..అయిదునక్షత్రాల హోటల్లో విడిదీ,భోజనసదుపాయాలు..ఇతర సౌకర్యాలూను. నోరూరిపోదూ వారికి మరి!

లైఫ్ టైం అచీవ్ మెంటు అవార్డు ను పోలిన ఈ పురస్కారానికి..దేశవ్యాప్తంగా అనేక మందిని జల్లెడబట్టి ,అందులో ..నన్ను వెలికి తీశామని, వారు రాశారు.

లోగడ ఈ అవార్డును విక్టొరియా హాలు,జాతీయ గ్రంథాలయం, విలియంకోట ,శాంతినికేతనము..తదితర వేదికలపై అందజేశామనీ, ఇప్పటి వేదికను త్వరలోనే తెలియపరుస్తామని రాశారు.

ప్రణబ్  ముఖర్జీ ,సోమనాథ చటోపాధ్యాయ, గవర్నరు గోపాలకృష్ణ గాంధి తదితర ప్రముఖులు సంతకం జేసిన "సారస్వత్ సమ్మాన్ " పత్రం నమూనను కూడా దీని వెంట జత పరిచారు. నరేంద్రనాథ్ చక్రవర్తి,అభిజిత్ ఘోష్ మొదలగు  వారి  సంతకాలతో “అకాడెమీ ఆఫ్ బెంగాలీ పోయెట్రీ.”.చిరునామా ఫోనులతో ..ఈ ఉత్తరం పకడ్బందీ గా రచించబడింది.

 బెంగాల్ గవర్నర్ సంతకానికీ,మూడు  సింహాల ప్రభుత్వ చిహ్నానికి కొదవ లేదు.

మెట్లమీద వరసలు వరసలుగా కూర్చిని నిల్చొని ..నిబ్బరంగా చూస్తున్న రచయితల గుంపుచిత్రం ఒకటి కూడా జత పరచబడింది.

అన్నీ బాగానే ఉన్నాయి కానీ, నేనేనాడు కవిత్వం రాసిన  పాపాన బోలేదు కందా..  మరి ఏమిటిది చెప్మా!

 అసలు రవీంద్రుడు తప్ప  వేరొక బెంగాలు కవి లోకమానవాళ్లు తెలియవు కందా...కవిత్వం అకాడెమీ ల సంగతి సమాచారాల  ఊసెత్తానా ఎప్పుడన్నా..?
అది అటుంచి, వారికి నా గురించి తెలవడేమేమిటీ.. అనేకానేక కవులు కొలువై ఉండగా వారినందరినీ వదిలి ..   నామానాన నేను నాలుగు కథలేవో రాసిన భాగ్యానికి నాకీ  జీవితకాల పురస్కారమేమిటి.. అసలీ కుట్ర పన్నిన నా బెంగాలీ మిత్రులెవ్వరు?   ఆ అసమదీయులెవ్వరు? ఆసుపాసులు తెలుసుకోక పోతే ఎలా చెప్పండి?

తీరా వెళ్ళాక ఆ బెంగాలీ సాహితీవేత్తల ముందు ఎలా తెల్ల మొహం వేయను ? అందునా  తెలుగు మొహం పెట్టుకొని!

అదేదో ఇక్కడె తేల్చుకొంటే పోలా..?అవును మరి.

ఊరుకుంటానా.. గబగబ .. తెలిసిన నలుగురు బెంగాలీ మిత్రులకీ నాలుగు e-ఉత్తరాలు గెలికి పారేసా.

వారు అంత నిజాయితీగానే జవాబంపారు.

ఆ పేరు గల కవులు లేరు.కవితా అకాడెమీలు లేవు.  కోల్ కత్తా అంతా కాగడా వేసి వెతికినా.  ఇదేదో   కోల్ కత్తా మాయ పొమ్మంటూ.
పదుగురాడు మాట పాడియవుతుంది కందా.. నా అదృష్టం ఏమంటే పదుగురు పదారు సలహాలు గుప్పించారు.అడగీ అడక్కుండానే.

వొకరన్నారు కందా.."మన సొమ్మేం పోయింది ..వప్పు కుంటే ? ఎవరిచ్చినా జాతీయ  అవార్డంటే జాతీయ అవార్డే .  ఎంత ప్రతిష్ట! ఎంత గౌరవం! వొదులుకొంటారా ఎవరన్నా ? "అని మెటికలు కూడా విరిచారు."మరీ వింతపోకడ పోతున్నారు..వద్దనీ అదనీ ఇదనీ"..మూతికూడా వంకర తిప్పారు.

"బోల్డన్ని అవార్డులు  వచ్చేది ఇల్లాగే..మీరు మరీను.. ! "మరొకరు తీగలుతీశారు.

హతోస్మి.

“అవన్నీ అలా వుంచి.. ఆంధ్రులకు ఎంత గౌరవం... ఇది ఒక తెలుగు రచయితకు దక్కనున్నదీ..మీకు కాదు . పిలిచి 

పురస్కారం  ఇస్తానంటే వద్దంటారా ఎవరైనా? అవార్డు రా మోకాలడ్డేవారుంటారా, మరీ విడ్డూరం కాకపోతే !

మీరు కాకుంటే మరొకరు తీసుకొంటారు ! ఆగుతారా ఎవరన్నా? "

***

మెలికపడిందెక్కడో  అదీ చెప్పనీయండి.

అంగీకారపత్రంతో బాటు, పదివేలు ఫణంగా పంపమన్నారు!

అదుగో అదే ... నే చెప్పొచ్చేది.!

***

హాచ్చ్..

సారీ..సారీ ..

ఇది హోక్ష్ అట!

సరి సరి!

***

అందుకే కదా అన్నారు, 

నలుగురికీ తెలవడం నాలిగిందాల చేటు అని!

***11-7-10***

All rights @ writer. Title,labels, postings and related copyright reserved.