Jul 12, 2009

పర్సు కొద్దీ పసిడిజడ

ఇప్పుడు వినడానికి విడ్డూరం గా ఉండదేమో కానీ, రెండు మూడేళ్ళ నాటి మాట.
ఒక్కసారిగా తెలుగు నాట ఏ పందిట్లో చూసినా పసిడిజడల మిల మిలలు.నోరెళ్ళబెట్టామంటే నమ్మండి! సరిగ్గా రెండా మూడా లేదా నాలుగా అని నిలదీస్తే ..గబుక్కున చెప్పలేము.
బెత్తెడుజడా జానెడుజడా లేదా జానాబెత్తెడు జడా ..అంటే మాత్రం చటుక్కున చెప్పొచ్చు.
మీ అమ్మాయి ఈకలా జుట్టు కత్తిరించుకున్నా దిగుల్లేదు. మీ ఆవిడ లేజర్కట్ చేయించుకొన్నా ఫరవా లేదు.పిన్నుల్తో అతికించ వచ్చు.కొక్కేలతో తగిలించ వచ్చు .
గులాబీనో ముడిచి.. కనకాంబరాలో ..మల్లెలో ..ఓ మెలిక వేయచ్చు.
ఒట్టి బంగారం...రాళ్ళూరవ్వలూ....కెంపులు పచ్చలు..ముత్యాలుపగడాలు ..పర్సు కొద్దీ పసిడిజడ.
అవును మరి. అది అలాంటి ఇలాంటి ఆభరణం కాదు కదా.. తలకెక్కినది..!
"ఇదెక్కడి చోద్యమమ్మా.. మా కాలాన చిన్నం బంగారం ఎరుగుదుమూ..అయినా మేమిట్టాంటి ఇడ్డూరాలు ఇన్నామా కన్నామా..పిదపకాలం పిదప కాలమనీ " పున్నమ్మా అదుగో బుగ్గలు నొక్కుకొంటోంది.
"ముడవనింకే ఆయమ్మకే ముంతంత కొప్పున్నట్లు ..ఓ యబ్బ .. ఆ వొచ్చలమ్మది వొగులు మారి వొయ్యారం..!" ..రాగవ్వ మూతి తిప్పుతోంది.
ఒక పక్క పొయ్యికెక్కించను ఉప్పు పప్పు కొనలేక విల విలాడుతుంటే మరీ ఇంత విలాసమా..!
ష్..!!!
గట్టిగా అనకండి !! విని పోగలరు...!
భూములా తేలిపోయే .. సాఫ్ట్ వేరా హార్డయి పోయే...అమెరికానా ఆర్ధిక మాంద్యాన ఈదులాడుతుండే ...వద్దంటే వళ్ళో వచ్చి పడుతున్న డబ్బుదస్కం జడన ముడేయక ఎట్లా చెప్పండీ?

పసిడి కొండెక్కితే జడ తలకెక్కదా ?
ఆ మాత్రం అర్ధం చేసుకోవాలి మీరు..!


తాజాకలం:పున్నమ్మ, రాగవ్వ లెవరో పాఠకులు గ్రహింతురు గాక..!
తాజాతాజాకలం: దారేది.."దారిద్య రేఖకు దిగువన"

All rights reserved @writer. Title,labels,postings and related copyright reserved.

1 comment:

  1. O pamu jada.. satyabhama Jada..pattu jada..rasapattu jada.. :) anTu oldtimer ramanagaru RadhaGopaLLamlO O Maanchi paTa raasaru. Adi vinna pratiSaari, chinnatanamlO functions lO pulaJadalu, papiDibillalu gurtukuvastaayi. Jadanu duvvaTaniki teerika lEkO leka wealth/Fashionku prateekO kaani chaantadu lanti jadalanu gorra tokalanu Chestunnaru. Ika yE cineKavainaa ..Aliveni animutyama.. anaalanTE maromaaru aalOchichukOvaalsinDE sumaa!!

    ReplyDelete

బుద్ధుడిమాట ఈ పూట