పరిచిన మెట్లు

పిల్లలింకా బడికి రాలేదు.
పంతుళ్ళు బడికి రాలేదు.
ఇప్పుడో అప్పుడో  వస్తారు కాబోలు.



పిల్లల కోసం పరిచిన మెట్లు
పక్కకు తొలిగాయేం ?
నిన్న మలిగిన రాత్రి
వాన కురిసిన ఆనవాళ్ళు లేవే !
ఏ కట్టు తప్పిన పసరం
ఎడా పెడా నడిచెళ్ళిందో !

పిల్లలింకా బడికి రాలేదు.
పంతుళ్ళు బడికి రాలేదు.
ఇప్పుడో అప్పుడో  వస్తారు


కొత్తగా చేరిన బుజ్జి పిల్లలు
తిన్నగా పలకయినా పట్టలేరు.
బలపం చేతికిస్తే
ముక్కలుచేద్దామా గుటుక్కుమనిపిద్దామా
అన్న సందిగ్దంలో తడిచిన ముఖాలు!


ఉప్మా తయారంటే ,
తల్లెలెక్కడో తెలియని పసితనం.
అదాటున వచ్చిపడే సెలవు
గుప్పెడు మెతుకులకా ?
గుక్కెడు  అక్షరాలకా ?

అయినా,
గుట్టలెక్కి పుట్టలు దాటి
పొలం గట్ల మీదుగా నడిచొచ్చే
ఆ చిట్టి పాదాలకు ఈ మెట్లొక లెక్కా..?






ఎవరు చెప్పేరని ,
ఈ మెట్లకు మట్టి మెత్తుతున్నావు తల్లీ?
                                                                అన్నట్టు,

అది మిత్రవనం వాకిలి కదూ...?
అందుకేనా మరి ?

పిల్లలింకా బడికి రాలేదు.
పంతుళ్ళు బడికి రాలేదు.
ఇప్పుడో అప్పుడో  వస్తారు

అందాకా సెలవా  !

***
చిన్నారి పొన్నారి స్నేహితులందరికీ ..
జేజేలు!

***
 "మిత్రవనం" ఉపాధ్యాయులు శ్రీ రాము, రమేశ్ గార్లకు, రిషీవ్యాలీ పల్లెబడి, అధ్యాపకురాలు శ్రీమతి సుశీల గారికి ధన్య వాదాలతో ...

All rights @ writer. Title,labels, postings and related copyright reserved.